అవతారిక

శ్రీ శివాశివదంపతీ చిత్కళలకు శంకరాచార్య శృంగేరి శారదలకు విబుధ గురు దేవ పాదారవిందములకు అంజలించెద సభలోని అందరికును

సీ|| విజయనగరపౌర విద్వాంసులార! ధీమంతులార! సుగుణవంతులార! సరసహృదయులార! సమ్మాన్యులార!స- న్మిత్రులార! యజాతశత్రులార! పరమ పావనులార! పారగులైనట్టి - పండితోత్తములార! పరములార! దరహాసపూర్వకా దరణంబుతోడ - వక్తలనలరించు వర్యులార!

గీ|| విజయభావన సాహిత్య వేదిపైన నాదు వాక్కుల హనుమన్నాటకమును శాంతచిత్తముతో మీరు సాంతముగను - వినగ కోరుచునుంటినో విబుధులార||

హనుమన్నాటకం ఒక చిత్రమైన నాటకం. ఇందులో 14 అంకాలు 579 శ్లోకాలు ఉన్నాయి. దీనికే మరో ప్రతికూడా ఉన్నది. దానికి ‘మహానాటక’ మనిపేరు. విషయమిదే. దానిలో 9 అంకాలు 791 శ్లోకాలూ ఉన్నాయి. రెండింటిలోనూ సుమారు 300 శ్లోకాలు సమానంగా కనిపిస్తాయి.

అనర్ఘరాఘవం, ప్రసన్నరాఘవం, శాకుంతలం, మహావీరచరితం,వాల్మీకిరామాయణం,బాలరామాయణం, భోజప్రబంధం, ధ్వన్యాలోకం -లలోని శ్లోకాలుకూడా ప్రాసంగికంగా అక్కడక్కడ కనిపిస్తాయి.

కథ రామకథ. గద్యభాగంకన్నా పద్యాలే యెక్కువగా కనిపిస్తాయి. ఒక్కొక్క ఘట్టం ఒక్కొక్క అంకంగా పేరుపెట్టబడింది. జానకీస్వయంవరతో ప్రారంభమై చివరకు శ్రీరామవిజయంతో నాటకం ముగుస్తుంది